ახალი ამბები
განათლების მინისტრი და სახელმწიფო რწმუნებული შოთა მესხიას სახელობის ზუგდიდის სახელმწიფო უნივერსიტეტში ადმინისტრაციის თანამშრომლებსა და აკადემიურ პერსონალს შეხვდნენ
საქართველოს განათლების, მეცნიერებისა და ახალგაზრდობის მინისტრი გივი მიქანაძე უმაღლესი განათლების სისტემის რეფორმის ფარგლებში, სახელმწიფო უნივერსიტეტების წარმომადგენლებთან შეხვედრებს აგრძელებს.
მინისტრმა მორიგი შეხვედრა შოთა მესხიას ზუგდიდის სახელმწიფო უნივერსიტეტში გამართა, სადაც ადმინისტრაციის თანამშრომლებსა და აკადემიურ პერსონალს რეფორმის მიმდინარეობის ძირითადი მიმართულებები გააცნო.
გივი მიქანაძემ ყურადღება გაამახვილა როგორც შრომის ბაზრის მოთხოვნებზე ორიენტირებული ახალი პროგრამების განვითარებაზე, ასევე ინფრასტრუქტურის გაუმჯობესების მნიშვნელობაზე.
,,უმაღლესი განათლების სისტემის რეფორმის ფარგლებში რეგიონულ უნივერსიტეტებს პროფილური დატვირთვა ექნებათ. შემდეგი სასწავლო წლიდან ზუგდიდის სახელმწიფო უნივერსიტეტში სტუდენტთა მიღება ძირითადად აგრარულ, პედაგოგიურ და ტურიზმის საგანმანათლებლო პროგრამებზე გამოცხადდება. სხვა მიმართულებების პროგრამები კი, მილევად რეჟიმში გადავა.
მსურს აღვნიშნო, რომ ამ პროცესში ჩვენ მაქსიმალურად შევინარჩუნებთ აკადემიურ პერსონალს, რომელიც უმაღლესი საგანმანათლებლო დაწესებულების განვითარებაში უდიდეს როლს ასრულებს”,- განაცხადა გივი მიქანაძემ.
შეხვედრა კითხვა-პასუხის რეჟიმში წარიმართა და მონაწილეებს შესაძლებლობა ჰქონდათ, მათთვის საინტერესო კითხვებზე მიეღოთ ამომწურავი პასუხები და თავიანთი პოზიციები დაეფიქსირებინათ.
დამსწრე საზოგადოებას ასევე სიტყვით მიმართეს სამეგრელო-ზემო სვანეთის მხარეში რწმუნებულმა დავით ვერავამ, ზუგდიდის მერმა დავით კოდუამ, განათლების, მეცნიერებისა და ახალგაზრდობის მინისტრის მოადგილე ზვიად გაბისონიამ და ზუგდიდის სახელმწიფო უნივერსიტეტის რექტორმა თეონა ხუფენიამ.
