პრემიერ-მინისტრი და სახელმწიფო რწმუნებული ფერმერებს შეხვდნენ

საქართველოს პრემიერ-მინისტრი მამუკა ბახტაძე, სამეგრელო-ზემო სვანეთის სახელმწიფო რწმუნებული ალექსანდრე მოწერელია და გარემოს დაცვისა და სოფლის მეურნეობის მინისტრი ლევან დავითაშვილი ზუგდიდში, ფერმერებს შეხვდნენ და აზიურ ფაროსანასთან ბრძოლისა და თხილის გადარჩენის პროგრამის შედეგები შეაჯამეს.

სახელმწიფოს, ფერმერების, კერძო სექტორის და დონორი ორგანიზაციების თანამშრომლობის შედეგად, დასავლეთ საქართველოში აზიური ფაროსანას რაოდენობა მკვეთრადაა შემცირებული.

ფერმერებთან გამართული შეხვედრის შემდეგ, საქართველოს პრემიერ-მინისტრი თხილის საწარმო „ჯეო-ნათსში“ თხილის მიღებისა და გადამუშავების პროცესს გაეცნო. შეხვედრას აშშ-ის ელჩის მოვალეობის შემსრულებელ ელიზაბედ რუდი ესწრებოდა.

შპს „ჯეო ნათსი“ „ერთიანი აგროპროექტის“ ფარგლებში შეიქმნა. საწარმოში, ჯამურად, 2 780 000 ლარამდე ინვესტიცია განხორციელდა, საწარმოში წელიწადში 7 000-10 000 ტონამდე თხილისგან სხვადასხვა სახის პროდუქციის წარმოებაა შესაძლებელი. პროდუქცია მთლიანად ექსპორტისთვის არის განკუთვნილი. გადამმუშავებელ საწარმოში 100 ადამიანია დასაქმებული.