„ევროპის დღე-2019“ მესტია

მესტიაში "ევროპის დღე 2019" გაიმართა. ღონისძიებას, სამეგრელო-ზემო სვანეთის სახელმწიფო რწმუნებულის მოადგილე ნინო ვიბლიანი, აპარატის უფროსი ლევან წულაია და რეგიონის მუნიციპალიტეტების მერები და საკრებულოს თავმჯდომარეები დაესწრნენ. ღონისძიება მესტიის მუნიციპალიტეტის მერის პირველმა მოადგილემ ნელი ნავერიანმა გახსნა. ,,ევროპის დღის" ფარგლებში, სამეგრელო-ზემო სვანეთის რეგიონის მეწარმეებისა და სასოფლო-სამეურნეო კოოპერატივების პროდუქციის გამოფენა-გაყიდვა გაიმართა, სტუმრებს ასევე შეეძლოთ მესტიის მუნიციპალიტეტის საჯარო სკოლების მოსწავლეების მიერ შექმნილი ევროპის დღისადმი მიძღვნილი ნახატები და პოსტერები დაეთვალიერებინათ. გამოფენის პარალელურად ადგილობრივი ანსამბლებისა და ინდივიდუალური შემსრულებლების მონაწილეობით კონცერტი ჩატარდა. "ევროპის დღის'' ფარგლებში სპორტული ღონისძიებებიც გაიმართა, მათ შორის ჩატარდა გარბენი, რომლის გამარჯვებულიც სახელმწიფო რწმუნებულის მოადგილემ დააჯილდოვა. ევროპის დღეები სსიპ-ის „საინფორმაციო ცენტრი ნატოსა და ევროკავშირის შესახებ“ და საგარეო საქმეთა სამინისტროს ორგანიზებით, წელს მეშვიდედ გაიმართა. ევროპის დღეების მიზანია ევროკავშირისა და საქართველოს ურთიერთობების, მიმდინარე ინტეგრაციის პროცესის შესახებ საქართველოს მოქალაქეების ინფორმირება და სხვადასხვა სამიზნე ჯგუფების ჩართულობის გაზრდა.