ზუგდიდში სახელმწიფო პროგრამით საოჯახო სასტუმრო გაიხსნა

საქართველოს პრემიერ-მინისტრმა და სამეგრელო-ზემოს სვანეთის მხარეში სახელმწიფო რწმუნებულმა - გუბერნატორმა ლევან შონიამ, სახელმწიფო პროგრამა „აწარმოე საქართველოში“ ფარგლებში, მიკრო და მცირე მეწარმეობის ხელშეწყობის მიზნით დაფინანსებული საოჯახო სასტუმრო „თბილი სახლი“ მოინახულეს.

გიორგი კვირიკაშვილს და ლევან შონიას მასპინძლობა სასტუმროს დამფუძნებლებმა - ირაკლი ყალიჩავამ და მაკა კორკელიამ გაუწიეს. მათ პრემიერს და გუბერნატორს განუმარტეს, რომ ამხანაგობაში გაერთიანების შემდეგ დააარსეს საოჯახო სასტუმრო. მათ მიკრო და მცირე მეწარმეობის ხელშეწყობის პროექტის ფარგლებში გაიარეს ტრენინგი და მიიღეს 10 000 ლარის მოცულობის დაფინანსება. ამ თანხით მეპატრონეებმა შეიძინეს ინვენტარი სასტუმროს კეთილმოსაწყობად და პირობების გასაუმჯობესებლად.

პრემიერ-მინისტრმა ხაზი გაუსვა მიკრო და მცირე მეწარმეობის ხელშეწყობის პროგრამის მნიშვნელობას. მისი თქმით, პროგრამის უმთავრესი ამოცანაა რეგიონებში მიკრო და მცირე ბიზნესის განვითარება მეწარმეთა მხარდაჭერისა და რეგიონული ბაზრების განვითარების გზით.