კონფლიქტისპირა სოფელ რიყეში გზის სამშენებლო სამუშაოები გუბერნატორმა და ზუგდიდის გამგებელმა დაათვალიერს

ზუგდიდის მუნიციპალიტეტის კონფლიქტისპირა სოფელ რიყეში საავტომობილო გზის მშენებლობა მიმდინარეობს. სამშენებლო სამუსაოები სამეგრელო-ზემო სვანეთის გუბერნატორმა ლევან შონიამ და ზუგდიდის მუნიციპალიტეტის გამგებელმა ედიშერ თოლორაიამ დაათვალიერეს. ამ ეტაპზე რიყეში ორი მილ–ხიდის სრული რეაბილიტაცია მიმდინარეობს გზის მშენებლობა კი სექტემბერში დასრულდება. სოფელში გზასთან ერთად მოეწყობა სანიაღვრე არხები და მთლიანად განათდება რიყე-ზუგდიდის დამაკავშირებელი ცენტრალური გზა. 

სამეგრელო-ზემო სვანეთის გუბერნატორის ლევან შონიას განმარტებით რიყის გზა მეექვსე მასშტაბური გზის პროექტია, რომელისც ზუგდიდის მუნიციპალიტეტში ხორციელდება. სახელმწიფო რწმუნებულმა რიყეში ახალი გზის აუცილებლობაზეც გაამხვილა ყურადღება და აღნიშნა, რომ ამ გზით ოკუპირებულ აფხაზეთში მცხოვრები მოქალაქეების ნაწილი დანარჩენ საქართველოს უკავშირდება. რიყის რეაბილიტირებული გზით რამდენიმე სოფელი ისარგებლებს.

პროექტი რეგიონალური განვითარების ფონდისა და ზუგდიდის მუნიციპალიტეტის გამგეობის თანადაფინანსებით ხორციელდება, რომლის ჯამიური ღირებულება 1 მილიონ 270 ათას ლარს შეადგენს. ასფალტის საფარიანი გზა 3,8 კილომეტრზე დაიგება.

სამშენებლო სამუშაოებში ადგილობრივები მოსახლეობაა დასაქმებული.

რიყელებს გზის პრობლემა ბოლო 20 წელია აწუხებთ. თუმცა მათთვის პრობლემა აქამდე არავის მოუგვარებია.