რეგიონში თოვლისგან გაწმენდითი სამუშაოები მიმდინარეობს

თოვლის სახით უხვი ნალექისგან გაწმენდითი სამუშაოები ზუგდიდში, წალენჯიხაში, ხობსა და ჩხოროწყუში წუხელ მთელი ღამის განმავლობაში მიმდინარეობდა. ზუგდიდში წუხელვე მოხდა ყინულის სასახლის გუმბათის თოვლისგან გაწმენდის სამუშაოები.

სამუშაოებს პირადად ხელმძღვანელობდნენ სამეგრელო-ზემო სვანეთის გუბერნატორის პირველი მოადგილე კობა ქანთარია და ქალაქის მერი ირაკლი გოგოხია მოადგილეებთან ერთად. ადგილზე იმყოფებიან და საგანგებო სიტუაციების მართვის სამსახურთან ერთად სამუსაოებში ჩართული იყვნენ გუბერნატორის და მერიის ადმინისტრაციის თანამშრომლები. ,,ენერგო-პრო ჯორჯიას“ დასავლეთ საქართველოს რეგიონალური ფილიალის ტექნიკური სამსახური, წუხელ საღამოდან საგანგებო რეჟიმში მუშაობს.

დიდთოვლობის გამო, ზუგდიდში, 35 კვ ელექტროგადამცემ ხაზებზე “წალენჯიხა“ და „ცაიში“ მოხდა დაზიანება, რის გამოც ელექტროენერგიის მიწოდება შეეზღუდათ ზუგდიდის სოფლებს: ცაიშს, კურორტს, ზედა ეწერს, და კორცხელს. წუხელვე დაუყონებლივ გავიდნენ ბრიგადები დაზიანების ადგილის ლოკალიზების მიზნით. ამ დროისთვის დაზიანეული კერების აღდგენითი სამუშაოები მიმდინარეობს. დილიდან რეგიონში არ თოვს.